Remake movies : డిసెంబర్ వచ్చేసింది. 2022 ఏడాది ముగింపు మొదలైంది. ఈ ఇయర్ కొంచెం ఇష్టంగా.. కొంచెం కష్టంగా అలా అలా సాగిపోయింది. ముఖ్యంగా టాలీవుడ్ ఇండస్ట్రీకి ఈ ఏడాది మిక్స్డ్ ఫలితాలను మిగిల్చింది. ఈ సంవత్సరం అగ్ర హీరోల నుంచి యంగ్ హీరోల వరకు చాలా మంది రీమేక్లపై ఆధారపడ్డారు. కొందరికి రీమేక్లు సక్సెస్ను అందిస్తే.. మరికొందరికి పరాజయాన్ని రుచిచూపించాయి.
ఈ ఏడాది టాలీవుడ్ బాక్సాఫీస్ను షేక్ చేసిన సినిమాల్లోనూ రీమేక్‌ల హవా బాగానే ఉంది. చాలా మంది రీమేక్ అంటే కాపీ పేస్ట్ అంటూ విమర్శలు చేస్తుంటారు. కానీ అవి రూపొందించాలంటే పరభాషలో సినిమా విజయానికి కారణాలు ఏంటి, మన భాషలో విజయం సాధించడానికి అవసరమైన అంశాలు ఏంటి అని లెక్కలు వేసుకుని తీయాలి. ఈ ఏడాది వచ్చిన రీమేక్స్ ఎన్ని, అందులో హిట్లు ఎన్ని, పరాజయాలో తెలుసుకుందామా..?
ఈ ఏడాది వచ్చిన రీమేక్లలో మెగా కాంపౌండ్ నుంచే ఏకంగా మూడు సినిమాలు ఉన్నాయి. విచిత్రమేంటంటే.. ఈ మూడు రీమేక్లో బాక్సాఫీస్ను షేక్ చేశాయి. హీరోలకు రికార్డుల పంట పండించాయి. మలయాళ మూవీ లూసిఫర్ రీమేక్ గాడ్ ఫాదర్తో మెగాస్టార్ చిరంజీవి ఆచార్య ఫ్లాప్ నుంచి బయటపడ్డారు. మరోవైపు మలయాళీ మూవీ అయ్యప్పనుమ్ కోశియుమ్ రీమేక్ భీమ్లా నాయక్తో పవన్ కల్యాణ్ మరోసారి రఫ్ఫాడించాడు.
ఇంకోవైపు తమిళ్ సినిమా ప్యార్ ప్రేమ కాదల్ రీమేక్ ‘ఊర్వశివో రాక్షసివో‘ అంటూ అల్లు శిరీష్ తన ఖాతాలో ఓ సూపర్ హిట్ మూవీని వేసేసుకున్నాడు.
టాలీవుడ్ మాస్ కా దాస్ విశ్వక్సేన్కు సూపర్ హిట్ను అందించింది ఓరి దేవుడా మూవీ. తమిళంలో ఓ మై కడవలే సినిమాకు ఇది రీమేక్. ఈ సినిమాలో విక్టరీ వెంకటేశ్ దేవదూతగా నటించారు. ఈ మూవీ ఆశించినంత ఆడకపోయినా.. మీడియం రేంజ్ వసూళ్లు రాబట్టింది.
మరోవైపు సీనియర్ హీరో రాజశేఖర్ మలయాళం మూవీ జోసెఫ్ను తెలుగులో శేఖర్గా రీమేక్ చేశారు. తన సతీమణి జీవిత రాజశేఖర్ డైరెక్షన్లో వచ్చిన ఈ సినిమా డీసెంట్ టాక్ను సొంతం చేసుకుంది.
ఈ ఏడాది రీమేక్ మూవీస్లో శాకిని డాకిని సినిమా కాస్త స్పెషల్. ఎందుకంటే ఇది హీరోయిన్ ఓరియెంటెడ్ మూవీ. అందులోనూ మల్టీ హీరోయిన్స్తో చేసిన సినిమా. రెజీనా కసాండ్రా, నివేదా థామస్ ప్రధాన పాత్రల్లో నటించిన ఈ సినిమా కొరియన్ మూవీ మిడ్ నైట్ రన్నర్స్కు రీమేక్. ఈ మూవీ ఆశించిన స్థాయిలో ప్రేక్షకులను ఆకట్టుకోలేకపోయింది.
మ్యూజిక్ డైరెక్టర్ కీరవాణి చిన్న కుమారుడు శ్రీసింహ ఈ ఏడాది నటించిన సినిమా దొంగలున్నారు జాగ్రత్త. ఈ సినిమా స్పానిష్ మూవీ 4×4 నుంచి ప్రేరణ పొంది తీసిందని టాక్. వైవిధ్యమైన కథలు ఎంచుకుంటున్న శ్రీసింహకు ఈ మూవీ మంచి ప్రశంసలు తెచ్చిపెట్టింది.
నవీన్ చంద్ర హీరోగా నటించిన మూవీ రిపీట్. డిస్నీ ప్లస్ హాట్స్టార్ వేదికగా రిలీజ్ అయిన ఈ సినిమా తమిళ్ మూవీ డెజావుకు రీమేక్.
ఈ శుక్రవారం విడుదల కానున్న సినిమాల్లో గుర్తుందా శీతాకాలం ఒకటి. ఇది కన్నడ మూవీ లవ్ మాక్టైల్కు రీమేక్. తెలుగు నేటివిటీకి తగ్గట్లు కొన్నిమార్పులు చేసినట్లు హీరో సత్యదేవ్ చెప్పాడు. ఇందులో తమన్నా, మేఘా ఆకాష్, కావ్యా శెట్టి హీరోయిన్లుగా నటిస్తున్నారు. కన్నడలో సూపర్ హిట్ టాక్ సొంతం చేసుకున్న ఈ సినిమాను తెలుగు ఆడియెన్స్ ఆదరిస్తారో లేదో చూడాలి.