Unstoppable 2 With NBK : నందమూరి నటసింహం బాలకృష్ణ ఓవైపు వెండితెరపై వెలుగులీనుతూనే మరోవైపు బుల్లితెరను శాసిస్తున్నారు. ఆహా ఓటీటీలో వస్తోన్న అన్స్టాపబుల్ షోకు హోస్టుగా వ్యవహరిస్తూ బాలయ్య అన్స్టాపబుల్గా దూసుకెళ్తున్నారు. ఈ షో ఫస్ట్ సీజన్కు వచ్చిన రెస్పాన్స్ చూసి మేకర్స్ సెకండ్ సీజన్ ప్లాన్ చేశారు. ఇక Unstoppable 2 With NBK గెస్టుల లిస్టు చూస్తుంటే ప్రేక్షకులు వావ్ అనుకుంటున్నారు.
రాజకీయ, సినీ ప్రముఖులను ఆహ్వానిస్తూ వారి ప్రొఫెషనల్, పర్సనల్ లైఫ్ గురించి తెలుసుకుంటూ ప్రేక్షకులను అలరిస్తున్నారు. చాలా సీరియస్గా ఉంటారనుకునే వారిలోని నాటీ యాంగిల్ను చూపిస్తున్నారు. ఇప్పటికే ఈ షోకు చంద్రబాబు, కిరణ్ కుమార్ రెడ్డి వంటి రాజకీయ ప్రముఖులు.. శర్వానంద్, అడివి శేష్ వంటి యంగ్ హీరోలు గెస్టులుగా వచ్చి అలరించిన సంగతి తెలిసిందే.
అయితే ఎప్పుడెప్పుడా అని ఎదురుచూస్తున్న ఫ్యాన్స్కు ఆహా రీసెంట్గా ఓ సూపర్ సర్ప్రైజ్ ఇచ్చింది. అదేంటంటే.. పాన్ ఇండియా స్టార్ ప్రభాస్తో ఓ ఎపిసోడ్ చేస్తున్నట్లు ప్రకటించింది. దానికి సంబంధించి గ్లింప్స్, ప్రోమోలు కూడా రిలీజ్ చేసింది. ఈ ప్రోమోలకే కోట్లలో వ్యూస్ వచ్చాయి. ఇక ప్రభాస్ను ఈ షోలో చూసిన ఫ్యాన్స్ తమ ఫేవరెట్ హీరో ఎప్పుడొస్తారా అని ఎదురుచూస్తున్నారు. అలా చాలా కాలంగా వెయిట్ చేస్తున్న పవర్స్టార్ పవన్ కల్యాణ్ ఫ్యాన్స్కు కూడా ఆహా ఓ రకంగా సర్ప్రైజ్ ప్లాన్ చేసినట్లు తెలుస్తోంది.
ఈ షోకు పవన్కల్యాణ్ కూడా రాబోతున్నారని గత కొద్ది రోజులుగా ప్రచారం సాగుతోంది. దీంతో పవన్-బాలయ్య ఒకే వేదికపై కనిపిస్తే ఎలా ఉంటుంది అనే ఉత్కంఠ ఆడియెన్స్లో నెలకొంది. వీరిద్దరి మధ్య రాజకీయాలపై ఎలాంటి చర్చ ఉండబోతోంది, పవన్ వ్యక్తిగత జీవితం గురించి బాలయ్య ఏమని ప్రశ్నిస్తారు? అని చాలా అనుమానాలు అభిమానుల్లో మెదులుతోంది. ఇకపోతే ఈ ఎపిసోడ్కు దర్శకుడు త్రివిక్రమ్ కూడా హాజరు కాబోతున్నట్లు తెలిసింది.
ఇందులో నిజమెంతో తెలియదు గానీ ఈ ఎపిసోడ్ గురించి మరో ఇంట్రెస్టింగ్ వార్త బయటకు వచ్చింది. బాలయ్య పవన్ను ఈ ప్రశ్నలు అడగబోతున్నారంటూ ప్రచారం సాగుతోంది. పవన్ రాజకీయ వ్యవహారాలు, సినిమాల విషయంలో త్రివిక్రమ్ ప్రమేయం ఉంటోంది అని బయట చాలా కాలంగా రూమర్ నడుస్తోంది. దాని గురించి బాలయ్య ప్రశ్నించనున్నారట. ఈ మధ్య కాలంలో రీమేక్ చిత్రాలు చేయడానికి గల కారణాన్ని బాలయ్య అడగనున్నారట. అలాగే పవన్-ఓ నటి మధ్య ఉన్న అనుబంధంపై చాలా కాలంగా ప్రచారంలో ఉన్న గాసిప్ గురించి క్లారిటీ తీసుకోబోతున్నారట. ఇంకా టీడీపీ, జనసేన పొత్తు విషయంలో పవన్ అభిప్రాయం ఏంటి అని కూడా అడుగుతారట.
ఇక ఈ ఎపిసోడ్లో మరో బిగ్ సర్ప్రైజ్ కూడా ఉండబోతున్నట్లు తెలుస్తోంది. షో మధ్యలో బాలకృష్ణ.. మెగాస్టార్ చిరంజీవి మధ్య సరదా ఫోన్ సంభాషణ కూడా ఉండనుందట. పవన్ను సరదాగా ఆటపట్టించే విషయాలని బాలయ్య చిరంజీవిని అడిగి తెలుసుకోబోతున్నట్లు టాక్. మొత్తంగా ఈ ఎపిసోడ్ నిజంగా ఉందో లేదో తెలియదు గానీ.. వైరలవుతున్న ఈ ప్రశ్నలు మాత్రం ఆడియెన్స్లో తెగ ఆసక్తి రేకెత్తిస్తోంది.