Hansika Motwani .. దేశముదురు సినిమాతో టాలీవుడ్ లో తెరంగేట్రం చేసింది. ఈ ముద్దుగుమ్మ తొలి సినిమాతోనే తెలుగు ప్రేక్షకుల మదిని దోచుకుంది. ఆ తర్వాత తెలుగు, తమిళంతో పాటు ఇతర భాషల్లో చాలా సినిమాలు చేసింది. ప్రస్తుతం ఈ బ్యూటీ తెలుగు కంటే తమిళ సినిమాలపై ఫోకస్ ఎక్కువ పెట్టింది. ఆ మూవీస్ తెలుగులో డబ్ కూడా అవుతున్నాయి. కానీ ఈ బ్యూటీ ఫోకస్ అంతా కోలీవుడ్ పైనే ఉంది.
కెరీర్ లో మంచి పీక్ స్టేజ్ లో ఉన్నప్పుడు తన వ్యాపార భాగస్వామి.. ప్రియుడు అయిన సోహైల్ ను వివాహమాడింది. రాజస్థాన్ లోని ఓ కోటలో చాలా గ్రాండ్ గా ఈ పెళ్లి జరిగింది. ఈ వేడుకకు హన్సిక-సోహైల్ ల కుటుంబం, మిత్రులు మాత్రమే హాజరయ్యారు. ఇక ఈ పెళ్లి వేడుకకు హన్సిక అనాథ పిల్లలను కూడా ఆహ్వానించింది. వారి కోసం కొత్త బట్టలు కుట్టించి.. స్పెషల్ ఆహ్వాన పత్రికలు కూడా ఇచ్చింది. వాళ్లను పెళ్లికి స్పెషల్ గా ఇన్వైట్ చేసి మరీ ఆతిథ్యమిచ్చింది.
అయితే ఇప్పుడు సెలబ్రిటీల పెళ్లి కూడా క్యాష్ చేసుకుంటున్నారు. సెలబ్రిటీల వివాహనికి ఫ్యాన్స్ వెళ్లే ఛాన్స్ ఉండదు కాబట్టి.. వాళ్లు వీరి పెళ్లిని చూసేలా కొన్ని ఓటీటీలు వెడ్డింగ్ డాక్యుమెంటరీలు తీస్తున్నాయి. దీనికి పాపులారిటీతో పాటు కోట్లలో ఆదాయం కూడా వస్తోంది. ఇప్పటికే లేడీ సూపర్ స్టార్ నయనతార తన పెళ్లి వీడియో హక్కులను ప్రముఖ ఓటీటీ నెట్ ఫ్లిక్స్ కి అమ్మేయడం.. ఆ ఓటీటీ వారు నయన్.. విఘ్నేష్ శివన్ ల పెళ్లి ని డాక్యుమెంటరీ తరహా లో తీయడం జరిగింది.
ఇప్పుడు హన్సిక – సోహైల్ ల వివాహానికి సంబంధించిన వీడియోను తమ ఓటీటీలో స్ట్రీమింగ్ చేయబోతున్నట్లుగా ప్రకటించింది డిస్నీ ప్లస్ హాట్ స్టార్. లవ్ షాదీ డ్రామా అనే టైటిల్ తో హన్సిక పెళ్లి వీడియోను ఒక డాక్యుమెంటరీ తరహాలో స్ట్రీమింగ్ చేయబోతున్నారు. డాక్యుమెంటరీ అంటే బోరింగ్ స్క్రీన్ ప్లేతో కాకుండా ఆకట్టుకునే పెళ్లి హడావుడి , ఒకింత డ్రామా, ఎంటర్ టైన్మెంట్ ను కూడా ఈ వీడియోలో డిస్నీ ప్లస్ హాట్ స్టార్ చూపించబోతున్నట్లుగా తెలుస్తోంది. తాజాగా దీనికి సంబంధించి ప్రోమో కూడా రిలీజ్ చేశారు. ఇప్పుడు ఈ ప్రోమో నెట్టింట తెగ వైరల్ అవుతోంది.