టాలీవుడ్ స్టార్ హీరోయిన్ సమంత ప్రస్తుతం సూపర్ బిజీగా ఉంది. ఈ బ్యూటీ టాలీవుడ్, కోలీవుడ్, బాలీవుడ్ సినిమాలు చేస్తూ బిజీబిజీగా గడుపుతోంది. నాగ చైతన్యతో విడాకులు.. ఆ తర్వాత మయోసైటిస్ వ్యాధితో ఫైట్.. మరోవైపు సోషల్ మీడియాలో ట్రోలింగ్.. ఇలా గతేడాదంతా సమస్యల వలయంలో చిక్కుకుని కొట్టుమిట్టాడని సామ్.. ఈ ఏడాది మాత్రం ఫుల్ జోష్లో సాగిపోతోంది. మయోసైటిస్ వ్యాధి నుంచి కోలుకున్న తర్వాత సామ్ వరుస సినిమాలు చేస్తూ బిజీగా అయిపోయింది. యశోద, శాకుంతలం సినిమాలతో ఇటీవలే ప్రేక్షకులను అలరించింది సమంత. ఇక ఇప్పుడు సిటాడెల్ వెబ్ సిరీస్ ఓవైపు.. ఖుషీ సినిమా మరోవైపు చేస్తూ క్షణం తీరిక లేకుండా గడిపేస్తోంది.
ఈ బ్యూటీ సినిమాలతో ఎంత బిజీగా ఉన్నా సోషల్ మీడియాలో మాత్రం చాలా యాక్టివ్. ప్రస్తుతం సామ్ రెండు చేతుల నిండా సంపాదిస్తోంది. ఓవైపు సినిమాలు.. మరోవైపు వాణిజ్య ప్రకటనలు.. ఇంకోవైపు బిజినెస్ చేస్తూ గట్టిగానే కూడబెడుతోంది. సమంత ఏం చేసినా సోషల్మీడియాలో హాట్టాపిక్గా మారాల్సిందే. అయితే ప్రస్తుతం సామ్కు సంబంధించి ఓ సూపర్ న్యూస్ నెట్టింట వైరల్ అవుతోంది. అదేంటంటే.. ఈ బ్యూటీ తాజాగా హైదరాబాద్లో మరో లగ్జరీ హౌస్ కొనుగోలు చేసిందట.
ప్రస్తుతం అత్యధిక రెమ్యునరేషన్ తీసుకుంటున్న సౌత్ ఇండస్ట్రీ హీరోయిన్లలో ఒకరిగా సమంత నిలిచిన విషయం తెలిసిందే. అయితే రీసెంట్గా కొద్ది రోజుల క్రితం ముంబయిలో ఓ లగ్జరీ అపార్ట్మెంట్ కొన్న ఈ ముద్దుగుమ్మ.. ఇప్పుడు మళ్లీ హైదరాబాద్లో ఓ పెద్ద డూప్లెక్స్ హౌస్ కొన్నట్లు ఓ ఇంగ్లీష్ వెబ్సైట్ కథనం ప్రచురించింది. ప్రస్తుతం దాని గురించే అంతా మాట్లాడుకుంటున్నారు. మరి ఆ లగ్జరీ హౌస్ విలువ ఎంత? ఏ ప్రాంతంలో కొనుగోలు చేసింది? ఆ వివరాలను తెలుసుకుందామా..?
హైదరాబాద్లోని ఫైనాన్షియల్ డిస్ట్రిక్ట్లో ఈ డూప్లెక్స్ అపార్ట్మెంట్ కొందట సమంత. నానక్రమ్గుడాలోని జయభేరి ఆరెంజ్ కౌంటీ గేటెడ్ కమ్యూనిటీలో కొనుగోలు చేసిందట. దాదాపు రూ.7.8 కోట్లు పెట్టి ఈ డుప్లెక్స్ హౌస్ తీసుకుందని.. ఇది 13, 14 అంతస్థులలో సుమారు 7,944 చదరపు అడుగులు ఉందని ఆ వెబ్సైట్ తన వార్తా కథనంలో ప్రచురించింది. ప్రస్తుతం ఈ న్యూస్ నెట్టింట హాట్ టాపిక్గా మారింది. సామ్ ప్రస్తుతం సంపాదనలో బిజీగా ఉందని.. దీపం ఉన్నప్పుడే ఇల్లు చక్కబెట్టుకోవాలన్న సామెతను సమంత అక్షరాలా పాటిస్తోందని నెటిజన్లు కామెంట్లు చేస్తున్నారు. మరికొందరేమో సమంత కెరీర్ మూడు పూవులు ఆరు కాయలు అన్న చందంగా చాలా జాలీగా సాగిపోతోందని మాట్లాడుకుంటున్నారు.