Siddharth Aditi Wedding: సినిమా ఇండస్ట్రీలో ఓ వార్త బాగా వైరల్ అవుతోంది. హీరో సిద్ధార్థ్, హీరోయిన్ అదితి రావు హైదరీ గుట్టు చప్పుడు కాకుండా రహస్యంగా పెళ్లి చేసుకున్నారనే టాక్ వినిపిస్తోంది. వారిద్దరూ వనపర్తిలోని శ్రీ రంగనాయక స్వామి ఆలయంలో పెళ్లి చేసుకున్నారు. ఇద్దరూ చాలా కాలంగా డేటింగ్‌లో ఉన్నారు. ఇప్పుడు వారిద్దరూ ఒక్కటైనట్లు తెలుస్తోంది. అదితి రావు, సిద్ధార్థ్ చాలా కాలంగా లివ్-ఇన్ రిలేషన్‌షిప్‌లో జీవిస్తున్నారని పుకార్లు వినిపించాయి. సినిమా సెట్స్‌లోనే వీరి ప్రేమకు అంకురార్పణ జరిగింది.
అదితి, సిద్ధార్థ్ తమ వివాహానికి సంబంధించిన అన్ని ఆచారాలతో ఒక్కటయ్యారు. ఈ వివాహానికి తమిళనాడు నుండి పూజారులను ప్రత్యేకంగా పిలిపించారు. హీరోయిన్ అదితికి వారిద్దరూ వివాహం చేసుకున్న ఆలయంతో ప్రత్యేక అనుబంధం ఉంది. సిద్ధార్థ్, అదితిల వివాహం అత్యంత సాధారణంగా జరిగింది. వీరి వివాహానికి కుటుంబ సభ్యులతో పాటు ప్రత్యేక బంధువులు మాత్రమే హాజరయ్యారు. అయితే, ఇప్పటి వరకు ఈ జంట పెళ్లికి సంబంధించి ఎలాంటి ఫోటో లేదా ప్రకటన చేయలేదు. అందుకే, సిద్ధార్థ్, అదితిల పెళ్లి ఫోటో ఎప్పుడు రివీల్ అవుతుందా అని అభిమానులు ఎదురుచూస్తున్నారు. తద్వారా వారు ప్రస్తుతం ప్రచారంలో ఉన్న వార్తలను పూర్తిగా నమ్మే వీలుంది.
సిద్ధార్థ్, అదితి కొన్నేళ్లుగా కలిసే ఉంటున్నారు. వీరు ఎక్కడికి వెళ్లినా జంటగానే వెళ్లేవారు. వారు సోషల్ మీడియాలో తరచూ ఇద్దరూ కలిసి ఉన్న ఫోటోలను షేర్ చేశారు. కాకపోతే సిద్ధార్థ్, అదితి తమ రిలేషన్ గురించి ఎప్పుడూ బహిరంగంగా మాట్లాడలేదు. ఇలాంటి పరిస్థితుల్లో వీరి పెళ్లి వార్త నిజమని తేలడంతో అభిమానులు ఆనందంలో మునిగితేలుతున్నారు. మహాసముద్రం చిత్రంలో సిద్ధార్థ్, అదితి కలిసి పనిచేశారు.