Manchu Vishnu : హీరో మంచు విష్ణు కలల ప్రాజెక్టు ‘కన్నప్ప’. ఇటీవల పూజా కార్యక్రమాలతో ప్రారంభమైన ఈ సినిమా రెగ్యులర్‌ షూటింగ్‌ న్యూజిలాండ్‌లో సోమవారం మొదలైంది. ఈ విషయాన్ని సోషల్‌ మీడియా వేదికగా తెలియజేస్తూ ప్రేక్షకుల ఆశీస్సులు కోరారు విష్ణు. ‘‘ఇది నా ఏడేళ్ల కల. శివపార్వతుల ఆశీస్సులతో సాకారమైంది. ఈ సినిమాలో భాగమైన ప్రతి ఒక్కరికీ ఎనిమిది నెలలుగా విశ్రాంతి లేదు. ఈ ప్రయాణంలో నిద్రలేని రాత్రులెన్నో! పండగ వేడుకలకు దూరంగా ఉన్నాం.
సెలవులు లేవు. ఆందోళన, భయం ఇంకా వెంటాడుతూనే ఉన్నప్పటికీ మనస్సు దృఢంగా ఉంది. ప్రపంచవ్యాప్తంగా నటీనటులు, సాంకేతికనిపుణులు కలిపి మొత్తం 600 మంది ఎన్నో త్యాగాలు చేసి కన్నప్ప కోసం న్యూజిలాండ్‌ వచ్చారు.‘కన్నప్ప’ సినిమా కాన్సెప్ట్‌ను నటుడు తనికెళ్ల భరణి ఏడేళ్ల క్రితం నాతో పంచుకున్నారు. దాన్ని మరింత పెద్దగా తీర్చిదిద్దేందుకు పలువురు ప్రతిభావంతులను సంప్రదించా. ఈ స్క్రిప్టు లార్జర్‌ దేన్‌ లైఫ్‌గా మారేందుకు రచయితలు పరుచూరి గోపాలకృష్ణ, విజయేంద్ర ప్రసాద్‌, తోటపల్లి సాయినాథ్‌, తోట ప్రసాద్‌, దర్శకులు నాగేశ్వర రెడ్డి, ఈశ్వర్‌ రెడ్డి కలిసి సహకారం అందించారు. ‘నేను ఇది చేయగలనా?’ అని సందేహంలో ఉన్న నన్ను నాన్న నమ్మారు. సపోర్ట్‌గా నిలిచారు.
సోదరుడు వినయ్‌ మోటివేట్‌ చేశాడు. ఇందులో సూపర్‌స్టార్లు నటిస్తున్నారని చెప్పేందుకు చాలా ఆనందంగా ఉంది. ఆ జాబితాను త్వరలోనే ప్రకటిస్తా. చిత్రీకరణ పూర్తయ్యే వరకు ఎలాంటి దృశ్యాలు/వివరాలు బయటకురాకుండా మా వంతు ప్రయత్నం చేస్తున్నప్పటికీ లీకుల బెడద సవాలుగా మారుతోంది. సినిమా ప్రారంభమైన సందర్భంగా మీ ప్రేమ, మద్దతు కోరుతున్నా. ‘కన్నప్ప’ ఓ సినిమా మాత్రమే కాదు ప్రేమ, అంకితభావం, అచంచల విశ్వాసంతో కూడిన శ్రమ’’ అని పేర్కొన్నారు.