Prabhas : ప్రభాస్, గోపీచంద్ ల గురించి ప్రత్యేకంగా పరిచయం అక్కర్లేదు. వారిద్దరూ ఇండస్ట్రీలో బెస్ట్ ఫ్రెండ్స్ అన్న విషయం తెలిసిందే. సినిమాల్లోకి రాకముందు నుంచి వారి స్నేహం కొనసాగుతోంది. ఇద్దరు కలిసి `వర్షం` సినిమాలో కూడా నటించారు. దీంతో వారి స్నేహం మరింత బలపడింది. అప్పట్నుంచి ఇప్పటివరకు ఆ స్నేహం అలాగే కొనసాగుతుంది. ది బెస్ట్ ఫ్రెండ్స్ గా ఈ ఇద్దరు రాణిస్తున్నారు. త్వరలో వారిద్దరూ కలిసి మళ్లీ ఓ సినిమా చేయాలనే ప్లాన్‌ చేస్తున్నట్లు సమాచారం. ఇదిలా ఉంటే ఇద్దరి మధ్య జరిగిన గొడవని బయటపెట్టారు ప్రభాస్. ఓ రోజు గోపీచంద్‌ని ప్రభాస్ తీవ్రంగా కొట్టాడట. అలా కొడితే గోపీచంద్ ముక్కు పగిలిందట.
ఇంతకీ ఇద్దరి మధ్య గొడవేంటంటే.. ప్రభాస్.. గోపీచంద్ వ్యక్తిత్వం గురించి బాలయ్యకి చెప్పారు. గోపీచంద్‌కి చాలా ఓపిక. ఏమాత్రం చిరాకు పడడని తెలిపాడు ప్రభాస్. ఈ సందర్భంగా తమ మధ్య జరిగిన విషయం బయటపెట్టాడు. ఓ సారి షూటింగ్‌లో గోపీచంద్‌కి గాయమైందట. ప్రభాస్‌కి నవ్వితే మనుషులను నెట్టే అలవాటు ఉందట. అలా ప్రభాస్ గోపీచంద్‌ని తరచూ నెట్టుతుండటం, కొట్టడం చేస్తుంటాడట. అయితే ఆ రోజు అప్పటికే గోపీచంద్ ముక్కు పగిలిందట. దీంతో ముందే చెప్పాడట. అరేయ్‌ ఈ రోజు నవ్వితే కొట్టొద్దు జాగ్రత్తగా ఉండమని చెప్పాడట. కానీ ప్రభాస్ ఆ విషయం మర్చిపోయాడట. కారులో వెళ్తున్న క్రమంలో ఏదో జోక్‌ వస్తే ఇద్దరు తెగనవ్వుకున్నారు. ఆ జోష్‌లో గోపీచంద్‌ని కొట్టాడట ప్రభాస్. దెబ్బకి ముక్కు నుంచి రక్తం కారిందట. అయినా గోపీచంద్ చిరాకు పడలేదట. ముక్కు నుంచి కారుతున్న రక్తాన్ని తుడుచుకుంటూ `అరేయ్‌ ఏంట్రా ఇది, కొంచెం చూసుకోరా` అని చిన్నగానే అన్నాడట. పాపం మంచోడు సర్‌, చిరాకు రాదు సర్‌ అని బాలయ్యకి అసలు మేటర్ చెప్పాడు ప్రభాస్.
బాలయ్య హోస్ట్ గా, అన్‌స్టాపబుల్‌ షో వచ్చిన విషయం తెలిసిందే. రెండో సీజన్‌లో ప్రభాస్, గోపీచంద్ కలిసి పాల్గొన్నారు. ఇందులో అసలు విషయం చెప్పాడు ప్రభాస్. గోపీచంద్ గొప్ప మనసుని, తమ మధ్య బాండింగ్‌ని వెల్లడించారు. ఈ వీడియో క్లిప్‌ ఇప్పుడు నెట్టింట వైరల్ అవుతుంది. అభిమానులని తెగ ఆకట్టుకుంటుంది. ప్రముఖ దర్శకుడు టీ కృష్ణ కొడుకు అని హీరో గోపీచంద్ `తొలి వలపు`చిత్రంతో హీరోగా పరిచయం అయ్యాడు. ఈ మూవీ జనాలను పెద్దగా ఆకట్టుకోలేదు. దీంతో విలన్‌గా `జయం`, `నిజం`, `వర్షం` చిత్రాలు చేశాడు. దర్శకుడు తేజ సినిమాల్లో విలన్‌గా మెప్పించారు. `వర్షం` తర్వాత హీరోగా మారాడు. `యజ్ఞం` చిత్రంతో హీరోగా హిట్‌ కొట్టాడు. వరుసగా హీరోగా సినిమాలు చేస్తూ వస్తున్నారు. ఇప్పుడు శ్రీనువైట్ల దర్శకత్వంలో ఓ సినిమా చేస్తున్నారు. దీనికి `విశ్వం`అని టైటిల్ అనుకుంటున్నారు ఇక ప్రభాస్ ప్రస్తుతం `కల్కి2898ఏడీ`, `ది రాజా సాబ్‌` చిత్రాల్లో నటిస్తున్నాడు.