ప్రస్తుతం ఇండస్ట్రీలో ఉన్న హీరోయిన్లలో రష్మిక, శ్రీలీల ఇద్దరూ టాప్‌లో కొనసాగుతున్నారు. వీళ్లిద్దరూ వరుస పాన్‌ ఇండియా సినిమాల్లో కనిపించనున్నారు. అయితే తాజాగా ఈ ఇద్దరూ భామలకు సంబంధించిన ఓ వార్త సోషల్‌ మీడియాలో ఆసక్తికరమైన చర్చకు దారితీయడంతో పాటు సినీ ప్రియులను ఆకట్టుకుంటోంది. రెండు సినిమాల్లో ఒకరి స్థానంలో మరొకరు మారినట్లు తెలుస్తోంది. గౌతమ్‌ తిన్ననూరి దర్శకత్వంలో విజయ్ దేవరకొండ హీరోగా ఓ చిత్రం తెరకెక్కుతోన్న విషయం తెలిసిందే.
ఇందులో హీరోయిన్‌గా శ్రీలీలను ఎంపిక చేశారు. ఈ మేరకు పూజా కార్యక్రమాలు కూడా నిర్వహించారు. ఇందులో విజయ్, శ్రీలీలకు సంబంధించిన ఫొటోషూట్‌ కూడా నిర్వహించారు. అయితే, ఈ ప్రాజెక్ట్‌ నుంచి శ్రీలీల వైదొలగినట్లు తెలుస్తోంది. ఆమె స్థానంలో రష్మిక వచ్చిందట. దీంతో విజయ్ దేవరకొండ, రష్మికల కాంబినేషన్‌ మరోసారి అలరించనుందని అభిమానులు సంబర పడుతున్నారు.
అలాగే వెంకీ కుడుముల దర్శకత్వంలో నితిన్‌ హీరోగా ఓ చిత్రం ఇటీవల మొదలైంది. చిరంజీవి క్లాప్‌ కొట్టి దీన్ని ప్రారంభించారు. ఇందులో హీరోయిన్‌గా మొదట రష్మికను ఎంపిక చేశారు. అయితే తాజాగా ఈ సినిమా నుంచి రష్మిక వైదొలగిందట. తన స్థానంలో శ్రీలీలను తీసుకోవాలని చిత్రబృందం భావిస్తోందట. ఇప్పటికే ఆమెను కలిసి కథ చెప్పారని దీనికి ఆమె గ్రీన్‌ సిగ్నల్‌ ఇచ్చినట్లు తెలుస్తోంది. అయితే ఇంకా వీటిపై అధికారిక ప్రకటనలు రావాల్సి ఉంది.