Telugu Actress : టాలీవుడ్లో ప్రస్తుతం తెలుగు హీరోయిన్ల హవా కొనసాగుతోంది. బేబీ సినిమాతో వైష్ణవి చైతన్య పేరు మార్మోగుతోంది. ఈ భామ నటనకు టాలీవుడ్ మొత్తం ఫిదా అయిపోయింది. ఇక శ్రీలీల గురించి కొత్తగా చెప్పనక్కర్లేదు. ఇప్పుడు టాలీవుడ్లో మోస్ట్ బిజీయెస్ట్ బ్యూటీ అంటే శ్రీలీలే. ఇలా తెలుగు హీరోయిన్లకు ఇండస్ట్రీలో గుడ్ టైం స్టార్ట్ అయిందనిపిస్తోంది. ఇప్పుడు శ్రీలీల దాదాపు డజన్ సినిమాలతో ఇండస్ట్రీని ఒక ఆట ఆడేసుకుంటోంది.
జనరల్గా ప్రతి 5 లేదా 10 ఏళ్లకు ఒక తరం హీరోయిన్ల నుంచి మరోతరం హీరోయిన్లకు ఇండస్ట్రీ మారుతూ ఉంటుంది. మొదట సావిత్రి ఆ తర్వాత వాణిశ్రీ.. అనంతరం శ్రీదేవి.. ఇక అక్కడి నుంచి రమ్యకృష్ణ, సౌందర్య, సిమ్రన్ ఇలా తరతరాలుగా హీరోయిన్లు మారుతూనే ఉన్నారు. ఇక 2000 సంవత్సరంలో శ్రియ, ఆర్తి అగర్వాల్ తెలుగు ఇండస్ట్రీని ఏలారని చెప్పుకోవచ్చు. ఓవైపు చిరంజీవి, బాలకృష్ణ, వెంకటేశ్, నాగార్జున వంటి సీనియర్ హీరోలతో రొమాన్స్ చేస్తూనే.. మరోవైపు ఎన్టీఆర్, ప్రభాస్, పవన్ కల్యాణ్ వంటి యంగ్ హీరోలతో జతకట్టారు.
ఇక వాళ్ల తర్వాత ఇలియానా, త్రిష.. వీళ్ల తర్వాత సమంత, కాజల్, పూజా హెగ్డే, రష్మిక మందన్న లాంటి వాళ్లు తమ హవా కొనసాగించారు. ఇందులో కొంత మందికి ఇంకా అవకాశాలు వస్తున్నాయి. మరికొంత మంది మాత్రం అవకాశాలు వస్తున్నా సరైన హిట్స్ లేక సతమతమవుతున్నారు. ఇలాగే అయితే ఇంకొన్ని రోజుల్లో తెలుగు తెరపై మాయమడవడం ఖాయంగా కనిపిస్తోంది. ఇంకొందరు బాలీవుడ్, కోలీవుడ్లలో తమ అదృష్టాన్ని పరీక్షించుకుంటున్నారు.
అయితే ప్రస్తుతం తెలుగు తెరను మృణాల్ ఠాకూర్, శ్రీలీల ఏలేస్తున్నారు. ఏ సినిమాలో చూసినా వీళ్ల పేరే వినిపిస్తోంది. వీళ్లను సినిమాల్లోకి తీసుకోవడానికే అటు హీరోలు.. ఇటు నిర్మాతలు ఇంట్రెస్ట్ చూపిస్తున్నారు. ప్రస్తుతం శ్రీలీల చేతిలో 9 సినిమాలు ఉన్నాయి. సూపర్ స్టార్ మహేశ్ బాబు, పవర్ స్టార్ పవన్ కల్యాణ్, విజయ్ దేవరకొండ, రామ్, వైష్ణవ్ తేజ్, బాలకృష్ణ, నితిన్ ఇలా వరుసగా సినిమాలు చేస్తూ బిజీబిజీగా ఉంది ఈ భామ. ఇక మృణాల్ కూడా నాని, విజయ్ దేవరకొండలతో సినిమాలు చేస్తోంది.
ఇక బేబీ సినిమాతో తాజాగా వైష్ణవి చైతన్య పేరు ఇండస్ట్రీలో తెగ వినిపిస్తోంది. ఈ సినిమాలో నటనకు చాలా మంది ఫిదా అయ్యారు. చూస్తూ ఉంటే ఈ భామకు కూడా త్వరలోనే ఆఫర్లు క్యూ కట్టేలా కనిపిస్తున్నాయి. అయితే ఇలా శ్రీలీల, వైష్ణవి చైతన్య, ఈషా రెబ్బ వంటి వాళ్లు తెలుగు ఇండస్ట్రీలో వరుస అవకాశాలు అందుకోవడం చూస్తుంటే.. ఇండస్ట్రీలో తెలుగు హీరోయిన్లకు గుడ్ టైం స్టార్ట్ అయినట్టే అనిపిస్తోందని నెటిజన్లు అంటున్నారు.