Sreelela : టాలీవుడ్లో ప్రజెంట్ హాప్పెనింగ్ హీరోయిన్ అంటే టక్కున గుర్తొచ్చే పేరు శ్రీలీల. ఈ బ్యూటీ పెళ్లి సందD మూవీతో టాలీవుడ్లోకి ఎంట్రీ ఇచ్చింది. ఆ సినిమా అట్టర్ ఫ్లాప్ అయింది. అయినా ఈ భామకు మాత్రం అవకాశాలు దూసుకొస్తున్నాయి. ఆ సినిమా తర్వాత వరుస అవకాశాలు అందుకుంటూ తెలుగు తెరపై టాప్ గేర్లో దూసుకెళ్తోంది శ్రీలీల. ధమాకా మూవీతో బ్లాక్ బస్టర్ బంపర్ హిట్ కొట్టి వంద కోట్ల క్లబ్లో చేరిపోయింది. పాత్ర నిడివితో సంబంధం లేకుండా.. ఫస్ట్, సెకండ్ లీడ్ అనే బేధం లేకుండా తన తలుపు తట్టిన దాదాపు అన్ని అవకాశాలకు గ్రీన్ సిగ్నల్ ఇచ్చేస్తోంది. ఒకే సారి డజను సినిమాలు లైన్లో పెట్టుకుని జెట్ స్పీడ్లో దూసుకెళ్తోంది. ఓవైపు యంగ్ హీరోలతో జత కడుతూ.. మరోవైపు సీనియర్ హీరోలతో పోటి పడీ నటిస్తోంది. ఈ బ్యూటీ జోరు చూసి యంగ్ హీరోలు, సీనియర్ నటులు శ్రీలీలే కావాలంటూ డైరెక్టర్లకు, నిర్మాతలకు అల్టిమేటమ్ జారీ చేస్తున్నారట.
ఇప్పటికే శ్రీలీల పవన్ కల్యాణ్, బాలకృష్ణ, మహేశ్బాబు, నితిన్, రామ్ పోతినేని వంటి స్టార్ హీరోల సినిమాల్లో నటించే ఛాన్స్ కొట్టేసింది. ప్రస్తుతం ఆ సినిమాలన్నీ సెట్స్పై ఉన్నాయి. వరుసగా సినిమా షూటింగుల్లో పాల్గొంటూ క్షణం తీరిక లేకుండా గడుపుతోంది. ఇంకా కొన్ని సినిమాల్లో స్టార్ హీరోయిన్లను సైతం పక్కన బెట్టి దర్శకనిర్మాతలు శ్రీలీలకే జై కొడుతున్నారంటే ఈ అమ్మడుకు ప్రస్తుతం ఉన్న క్రేజ్ ఏంటో అర్థం చేసుకోవచ్చు. రీసెంట్గా గుంటూరు కారం, ఉస్తాద్ భగత్ సింగ్లో పూజాహెగ్డే ఉండాల్సిందే.. కానీ ఆ భామను సైడ్ చేసి ఆ పాత్రల్లో శ్రీలీలను తీసుకున్నారు.
ఇప్పటికే డజను ఛాన్సులను చేతిలో పెట్టుకున్న శ్రీలీల ఫోకస్ ఇప్పుడు గ్లోబల్ స్టార్లు, పాన్ ఇండియా హీరోల మీద పడిందట. ఏకంగా గ్లోబల్ స్టార్ రామ్ చరణ్ కూడా శ్రీలీలపై ఇంట్రెస్ట్ చూపిస్తున్నట్లు టాక్. శంకర్ తెరకెక్కిస్తున్న ‘గేమ్ఛేంజర్’లో చరణ్ నటిస్తున్న సంగతి తెలిసిందే. దీని తర్వాత ఆయన ఉప్పెన ఫేమ్ బుచ్చిబాబుతో కలిసి ఓ స్పోర్ట్స్ బ్యాక్గ్రౌండ్ సినిమా చేయనున్నారు. ఆ సినిమాలో బాలీవుడ్ బ్యూటీ జాన్వీ కపూర్ను హీరోయిన్గా ఎంపిక చేసినట్టు అప్పట్లో టాక్ వినిపించింది. కానీ తాజాగా ఆ ఛాన్స్ శ్రీలీలకు వచ్చినట్లు తెలిసింది. రామ్ చరణ్ కూడా శ్రీలీల పేరును సజెస్ట్ చేశాడట.
ఇక శ్రీలీల పాన్ ఇండియా స్టార్ అల్లు అర్జున్ సినిమాలోనూ నటించే అవకాశం కొట్టేసిందట. ఇప్పటికే పుష్ప-2, త్రివిక్రమ్ దర్శకత్వంలో వస్తున్న మరో సినిమా పనుల్లో బన్నీ బిజీగా ఉన్నాడు. అయితే త్రివిక్రమ్ దర్శకత్వంలో వస్తున్న సినిమాలో హీరోయిన్గా విరూపాక్ష ఫేమ్ సంయుక్తను తీసుకోబోతున్నట్లు టాక్ వినిపించింది. ఇప్పుడు ఆ బ్యూటీని పక్కన పెట్టేసి శ్రీలీలకు జై కొట్టినట్లు తెలుస్తోంది. ఇదే నిజమైతే శ్రీలీల ఇద్దరు పాన్ ఇండియా స్టార్ల సినిమాల్లో నటించే ఛాన్స్ కొట్టేసినట్టే.