అర్జున్ రెడ్డి సినిమాతో ఓవర్ నైట్ స్టార్ అయిపోయాడు విజయ్ దేవరకొండ. తన లాస్ట్ సినిమా లైగర్ తో భారీ డిజాస్టర్ మూటగట్టకున్న విజయ్ ప్రస్తుతం శివ నిర్వాణ దర్శకత్వంలో ఖుషి మూవీ చేస్తున్నాడు. ఇందులో సమంత హీరోయిన్ గా నటిస్తోంది. సెప్టెంబర్ 1న ఈ చిత్రం ప్రేక్షకుల ముందుకు రానుంది. ఈ మూవీ రిలీజ్ కు ముందే గౌతమ్ తిన్న‌నూరితో ఒక సినిమా.. అలాగే దర్శకుడు పరుశురామ్‌ తో ఓ చిత్రాన్ని ప్రారంభించాడు. ఈ రెండు ప్రాజెక్టులు ఇటీవల పూజా కార్యక్రమాలు చేసుకున్నాయి. సినిమా షూటింగ్ మొదలెట్టేశాయి. పరుశురామ్‌ సినిమా విషయానికి వస్తే.. ఇందులో సీతారామం ఫేమ్ మృణాల్ ఠాకూర్ హీరోయిన్ విజయ్ సరసన నటిస్తోంది. గీత గోవిందం వంటి బ్లాక్ బస్టర్ హిట్ అనంత‌రం పరుశురామ్‌, విజయ్ కాంబోలో వ‌స్తున్న రెండో చిత్రం ఇది. సక్సెస్ ఫుల్ నిర్మాత దిల్ రాజు తన శ్రీ వెంక‌టేశ్వ‌ర క్రియేష‌న్స్ బ్యాన‌ర్ పై నిర్మిస్తున్నారు.
అయితే, తాజాగా ఈ సినిమా స్టోరీ లీకైనట్లు వార్త బ‌య‌ట‌కు వ‌చ్చింది. ఇది ప‌క్కా ల‌వ్ అండ్ ఫ్యామిలీ ఎంట‌ర్టైన‌ర్ అట. ఇందులో విజయ్ దేవరకొండ జాబ్ లేనినిరుద్యోగి కనిపిస్తాడట. అత‌డికి చిన్న‌ప్ప‌టి నుంచి అమెరికా వెళ్లాల‌నే ఓ క‌ల ఉంటుందట. దాంతో ఉద్యోగం కోసం అన్వేషిస్తూనే, ఎలాగైనా అమెరికా వెళ్లడం కోసం నానా పాట్లు ప‌డుతుంటాడ‌ట. ఇక అమెరికాలో నివాసం ఉంటే హీరోయిన్.. ఒక డాక్యుమెంటరీ షూటింగ్ కోసం ఇండియాకి వస్తుంది. ఆ సమయంలోనే ఇద్దరి మధ్య పరిచయం ఏర్పడి.. అది కాస్త ప్రేమగా మారుతుంద‌ట. ఆ త‌ర్వాత ఎలాంటి ప‌రిణామాలు చోటుచేసుకున్నాయి అన్న‌దే ఈ మూవీ కథ అని వార్త హల్ చల్ చేస్తోంది. కథకు తగ్గట్లుగానే ఈ మూవీకి ఫ్యామిలీ స్టార్ అనే టైటిల్ కూడా ప‌రిశీల‌న‌తో ఉంది. ఇందులో హీరో కుటుంబ విలువ‌ల‌కు ప్రాధాన్య‌త ఇస్తాడ‌ట. అందుకే ఆ టైటిల్ ను చిత్ర యూనిట్ పరిశీలిస్తుందని తెలుస్తోంది.
