నటుడు, మాజీ సీఎం.. తెలుగు జాతి గర్వించదగ్గ వారిలో ఒకరైన స్వర్గీయ ఎన్టీఆర్ శత జయంతి ఉత్సవాలు ఘనంగా జరుగుతున్నాయి. తెలుగు రాష్ట్రాలతో పాటు ప్రపంచవ్యాప్తంగా ఉన్న తెలుగు ప్రజలు, తెలుగుదేశం నాయకులు, ఎన్టీఆర్ అభిమానులు, ఎన్టీఆర్ శత జయంతి వేడుకలు నిర్వహిస్తున్నారు. ఈ మేరకు విజయవాడలో ఎన్టీఆర్ విజ్ఞాన్ ట్రస్ట్, దేవినేని చారిటబుల్ ట్రస్ట్ ఆధ్వర్యంలో ఎన్టీఆర్ శత జయంతి వేడుకలు చేశారు. ఈ కార్యక్రమానికి వైసీపీ నేతలు కొడాలి నాని, పేర్ని నాని, పలువురు నాయకులు, లక్ష్మి పార్వతి, డైరెక్టర్ రామ్ గోపాల్ వర్మ హాజరయ్యారు. ఈ కార్యక్రమంలో పాల్గొన్న ఆర్జీవీ చంద్రబాబు నాయుడుని తీవ్రంగా దుయ్యబట్టారు. కానీ జూనియర్ ఎన్టీఆర్ ని మాత్రం ఆకాశానికి ఎత్తుతూ వ్యాఖ్యలు చేయడం తీవ్ర వివాదాస్పదంగా మారింది.
ఈ క్రమంలో ఆర్జీవీ తన స్పీచ్ లో.. ‘నేను ఎన్టీఆర్ శత జయంతి ఉత్సవాల్లో పాల్గొనేందుకు రాలేదు. కానీ మీకు ఒక జోక్ చెప్పేందుకు వచ్చాను. ఆ జోక్ చాలా సీరియస్ జోక్. ఎవ్వరూ నవ్వలేనటువంటి ఆ జోక్ ఇప్పుడు రాజమండ్రిలో జరుగుతోంది. స్వర్గంలో ఉన్న ఎన్టీఆర్‌కు కూడా నవ్వాలో, ఏడ్వాలో కూడా అర్థం కానటువంటి జోక్ అది. ఇంటి సభ్యుడు, అల్లుడు అయ్యుండి అంత దారుణంగా టార్చర్ చేసి, ఏడిపించి ఏడిపించి చంపిన తర్వాత మళ్లీ ఆయనే దండ వేసి.. అసలు ఎన్టీఆర్ లాంటివాడు లేడని చెప్పడానికి మించిన జోక్ ఉండదనేది నా ఉద్దేశ్యం’ అని అన్నారు.
అదే విధంగా ‘ఒకవేళ లక్ష్మీ పార్వతి మాయలో ఎన్టీఆర్ పడ్డారంటే ఆయనకు బుర్ర లేదనేది మీ ఉద్దేశ్యమా? సీఎం స్థాయి మనిషి.. ఆయనకు బుర్ర లేకుండా లక్ష్మీ పార్వతి లాంటి ఒక అర్హత లేని మహిళ మాయలో ఆయన పడ్డారంటే.. మీరు ఇంకా ఆయనను ఎందుకు పూజిస్తున్నారు.. ఎందుకు దండలేస్తున్నారు.. కనీసం మీరు గతంలో చెప్పిన దానిపై నిలబడాలి కదా? అని ప్రశ్నించారు ఆర్జీవీ. ‘ఇక శత జయంతి ఉత్సవాలకు జూనియర్ ఎన్టీఆర్ ఎందుకు రాలేదు? అనేది నాకు తెలియదు.
కానీ ఈ మొత్తం ఎపిసోడ్‌లో నందమూరి తారక రామారావు గారి ఫ్యామిలీలో ఉన్న ఒకే ఒక్క మగాడు తారక్. ఎందుకంటే అంతపెద్ద సూపర్‌స్టార్ కొడుకులు కానీ, వాళ్లెవరూ రాకుండా చేసి ఈయన ఒక్కడే ఒక నిర్ణయం తీసుకున్నాడు. దీనికి తను ఏ కారణం చెప్పినా, చెప్పకపోయినా.. నా ఫీలింగ్ మాత్రం తాత గారి మీదున్న విపరీతమైన గౌరవంతో వీళ్లతో కలిసి స్టేజ్ మీద కనిపించకూడదని తను రాలేదని నా నమ్మకం. కాబట్టి ఎన్టీఆర్ అభిమానిగా తారక్‌కు నేను హృదయపూర్వకంగా థాంక్స్ చెప్తున్నా’ అన్నాడు ఆర్జీవీ.