sree vishnu : తెలుగు సినిమా ఇండస్ట్రీలో వైవిధ్యమైన సినిమాలు చేస్తూ తనకంటూ ప్రత్యేకమైన గుర్తింపు తెచ్చుకున్నారు హీరో శ్రీవిష్ణు (Sree Vishnu). ఏడాదికి రెండు మూడు సినిమాలు చేసుకుంటూ వెళ్తోన్న శ్రీవిష్ణు.. ‘బ్రోచేవారెవరురా’ తరవాత మళ్లీ అలాంటి హిట్ సినిమాను ప్రేక్షకులకు ఇవ్వలేకపోయారు. ‘తిప్పరా మీసం’, ‘గాలి సంపత్’, ‘రాజరాజ చోర’, ‘అర్జున ఫల్గుణ’తో పాటు కిందటేడాది వచ్చిన ‘భళాతందనాన’, ‘అల్లూరి’ సినిమాలు ప్రేక్షకులను ఆకట్టుకోవడంలో విఫలమయ్యాయి. అయితే, ఇప్పుడు ఒక మంచి ఫ్యామిలీ ఎంటర్‌టైనర్‌తో ప్రేక్షకులను మెప్పించేందుకు శ్రీవిష్ణు సిద్ధమవుతున్నారు. ‘సామజవరగమన’ అంటూ మే 18న ప్రేక్షకుల ముందుకు రానున్నాడు.
తాజాగా ఈ చిత్రం టీజర్ విడుదలై ఆకట్టుకుంటుంది. టీజర్ స్టార్టింగ్ నుంచి ఎండింగ్ వరకు కామెడీతో నిండిపోయింది. శ్రీవిష్ణు పంచులకు ప్రేక్షకులు పడిపడి నవ్వుకుంటున్నారు. ప్రేమించిన అమ్మాయిలతో హీరో రాఖీ కట్టించుకోవడం చాలా ఫన్నీగా అనిపిస్తుంది. అమ్మాయిల మీద ప్రేమ కలగకపోవడానికి గల కారణం చెప్పిన నవ్విస్తారు. ఇప్పటికే విడుదలైన ‘సామజవరగమన’ గ్లింప్స్ సైతం బాగా ఆకట్టుకుంది. ప్రేమించుకున్న ప్రతి ఒక్కరికీ కాస్ట్ ప్రాబ్లమ్స్, లేదా మనీ ప్రాబ్లమ్స్ వస్తాయి. కానీ నాకేంటి ఈ సమస్య వచ్చింది అంటూ శ్రీవిష్ణు చెప్పే డైలాగ్ అందరినీ ఆకట్టుకుంది. టీజర్ చూసిన ప్రతి ఒక్కరు ఈ దెబ్బతో శ్రీవిష్ణు ఖాతాలో మంచి హిట్ పడటం ఖాయం అంటున్నారు.
భాను బోగవరపు కథను అందించిన ఈ చిత్రానికి నందు సవిరిగాన సంభాషణలు రాశారు. దర్శకుడు రామ్ అబ్బరాజు స్వయంగా ఈ చిత్రానికి స్క్రీన్‌ప్లే రాశారు. గోపీ సుందర్ సంగీతం సమకూరుస్తుండగా.. రామ్ రెడ్డి కెమెరామెన్‌గా పని చేస్తున్నారు. ఛోటా కె ప్రసాద్ ఎడిటర్, బ్రహ్మ కడలి ఆర్ట్ డైరెక్టర్. ఈ చిత్రం షూటింగ్ చివరి దశలో ఉంది. ఈ ఏడాది వేసవిలో చిత్రాన్ని విడుదల చేస్తామని నిర్మాతలు ప్రకటించారు. ఈ సినిమాలో నరేష్, సుదర్శన్, శ్రీకాంత్ అయ్యంగార్, వెన్నెల కిషోర్, రఘు బాబు, రాజీవ్ కనకాల, దేవి ప్రసాద్, ప్రియ ముఖ్య పాత్రలు పోషించారు.