Actress : దొంగతనం కేసులో తెలుగు నటి సౌమ్యశెట్టిని పోలీసులు అరెస్ట్ చేశారు. తెలుగులో ది ట్రిప్, యువర్స్ లవింగ్లీ సినిమాల్లో నటించిన సౌమ్య డబ్బుల కోసం ఒకరితో స్నేహం చేసి.. వారి ఇంటికే కన్నం వేసింది. వివరాల్లోకి వెళితే.. విశాఖపట్నంలో ప్రసాద్ అనే రిటైర్డ్ పోస్టల్ ఉద్యోగి తన కుటుంబంతో కలిసి నివసిస్తున్నాడు. ఆయనకు ఒక కుమార్తె ఉంది. ఆ అమ్మాయి రీల్స్ చేస్తుంటుంది. అయితే, ప్రసాద్ కుమార్తెతో సౌమ్య శెట్టి సోషల్ మీడియా ద్వారా పరిచయం ఏర్పరచుకుంది. తనను తాను ఇన్ స్టాగ్రామ్ ఇన్ ఫ్లుయెన్సర్ గా చెప్పుకుని ఆ అమ్మాయితో స్నేహం చేసింది. అలా అలా పరిచయం పెంచుకుని సౌమ్య శెట్టి తరచుగా ప్రసాద్ ఇంటికి వచ్చేది.
ఇన్నట్లుండి ఒక రోజు ప్రసాద్ ఇంట్లో కిలో బంగారం, పెద్ద మొత్తంలో నగదు చోరీ అయ్యాయి. అప్పటినుంచి సౌమ్య శెట్టి వారి ఇంటికి రావడం మానేసింది. పెద్ద మొత్తంలో బంగారం, డబ్బు కనిపించకపోయే సరికి ప్రసాద్ కుటుంబం పోలీసులకు ఫిర్యాదు చేసింది. సౌమ్య శెట్టిపై ప్రసాద్ కుటుంబం అనుమానం వ్యక్తం చేయడంతో పోలీసులు ఆ కోణంలో దర్యాప్తు ప్రారంభించారు. పోలీసుల విచారణలో సౌమ్యశెట్టి ప్రస్తుతం గోవాలో ఉన్నట్టు తెలిసింది. ఆమె ఆచూకీ తెలుసుకున్న విశాఖ పోలీసులు… గోవా పోలీసుల సహకారంతో అదుపులోకి తీసుకుని విశాఖపట్నానికి తరలించారు. ప్రసాద్ ఇంట్లో బంగారం చోరీ చేసి గోవా వెళ్లి ఎంజాయ్ చేస్తున్నట్టు విచారణలో వెల్లడైంది. జూనియర్ ఆర్టిస్ట్ గా ఉన్న సౌమ్య శెట్టి గతంలో ‘ది ట్రిప్’, ‘యువర్స్ లవింగ్లీ’ వంటి పలు చిత్రాల్లో నటించింది. జల్సాలకు అలవాటు పడిన సౌమ్య శెట్టి ఆ తర్వాత అవకాశాలు రాకపోవడంతో ఇలా అడ్డదారి తొక్కింది. చేతిలో డబ్బులు లేక.. సినిమా అవకాశాల్లేక.. ఇలాంటి దారుణానికి ఒడిగట్టినట్లు సమాచారం. సౌమ్యాశెట్టిపై కేసు నమోదు చేసిన పోలీసులు.. రిమాండ్‌కు తరలించారు.
