Shanmukh Jaswanth బిగ్ బాస్ ఫేమ్ షణ్ముక్ జస్వంత్ ఇంట్లో గంజాయి, డ్రగ్స్ దొరికాయన్న వార్త పెద్ద గందరగోళం సృష్టించింది. అన్నయ్య సంపత్ వినయ్ కోసం హైదరాబాద్ నార్సింగి పోలీసులు షణ్ముక్ ఇంటికి వెళ్లారు. షణ్ముఖ్, అన్న సంపత్ వినయ్ ప్రేమ, పెళ్లి పేరుతో మోసం చేశారని, సంపత్ వినయ్ మరో యువతిని కూడా పెళ్లి చేసుకున్నాడని వైజాగ్‌కు చెందిన డాక్టర్ మౌనిక అనే యువతి తెర‌మీద‌కు వ‌చ్చి పోలీసులకు ఆశ్ర‌యించ‌డంతో అన్న‌ద‌మ్ముల భాగోతం బ‌ట్ట‌బ‌య‌లైంది. ఆమె ఇచ్చిన ఫిర్యాదు మేరకు పోలీసులు కేసు నమోదు చేశారు. షణ్ముక్ ఫ్లాట్‌కి వెళ్లి చూడగా, అనుకోకుండా సోదరులు గంజాయితో పట్టుబడ్డారని తెలిసింది. అయితే ఈ కేసులో బాధితురాలు మౌనిక సంచలన విషయాలు వెల్లడించింది. ప్రేమ, పెళ్లి పేరుతో మోసం చేసిన సంపత్ వినయ్‌తో పాటు షణ్ముక్ పేరు కూడా ఫిర్యాదులో ఉంది.
ఫిర్యాదులోని అంశాలు ఆమె మాటల్లోనే.. ‘యూట్యూబ్‌లో అవకాశం ఇప్పిస్తానని షణ్ముఖ్ మోసం చేశాడు. షణ్ముక్ ద్వారా అతని సోదరుడు సంపత్ పరిచయమయ్యాడు. ప్రేమ పేరుతో సంపత్ వినయ్ నాపై చాలాసార్లు లైంగిక వేధింపులకు పాల్పడ్డాడు. నన్ను హోటళ్లకు, విల్లాలకు తీసుకెళ్లి బెదిరించి లైంగిక దాడికి పాల్పడ్డాడు. పెళ్లి చేసుకోమని సంపత్‌ని బలవంతం చేయడంతో చేతికి ఉంగరం వేసి పెళ్లి అని నమ్మించాడు. తాము పెళ్లి చేసుకున్నామని, తనను చాలాసార్లు శారీరకంగా వాడుకున్నారని తెలిపింది. ఒకసారి బలవంతంగా అబార్షన్ కూడా చేయించాడని , అబార్షన్ విషయం సంపత్ తల్లిదండ్రులకు చెప్పాను. అబార్షన్ విషయం చెప్పవద్దని బెదిరించాడు. ఎవరికైనా చెబితే చేస్తే.. ఫిజికల్‌గా దిగిన ఫొటోలను సోషల్ మీడియాలో పెడతామని బెదిరించాడ‌ని తెలిపింది. సంపత్‌కి మరో యువతితో పెళ్లయిందని తెలిసి షాక్ అయ్యానని చెప్పుకొచ్చింది. నన్ను సంపత్ మోసం చేశాడని పోలీసులకు ఫిర్యాదు చేశాను. నేను కూడా పోలీసులతో పాటు సంపత్ ఫ్లాట్ కి వెళ్ళాను. షణ్ముఖ్ కూడా ఉన్నాడు.
ఇద్దరూ కలిసి గంజాయి తాగుతున్నారు. షణ్ముక్ వద్ద గంజాయి, మందు మాత్రలు కూడా ఉన్నాయి. షణ్ముక్, సంపత్ వద్ద కూడా మత్తు పదార్థాలను పోలీసులు గుర్తించారు. జావేద్ అనే కానిస్టేబుల్ షణ్ముక్‌కు సహాయం చేసేందుకు ప్రయత్నించాడు. డ్రగ్స్ చూడగానే మమ్మల్ని వెంటనే కిందకి వెళ్ల‌మ‌ని బలవంతం పెట్టాడు. కానిస్టేబుల్ జావేద్ నన్ను రాజీప‌డేందుకు ఒత్తిడి చేశాడు. డ్రగ్స్‌కి సంబంధించిన వీడియో రుజువు నా దగ్గర ఉంది. నా ప్రాణం ప్రమాదంలో ఉంది. నాకు న్యాయం కావాలి.’ అని బాధితులు మౌనిక ఫిర్యాదులో పేర్కొన్నారు. యూట్యూబ్‌లో అవకాశాల పేరుతో షణ్ముక్, పెళ్లి పేరుతో సంపత్ ఇద్దరు అన్నదమ్ములను మోసం చేశారని తెలిపింది. ఆమె ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. షణ్ముక్ ఇద్దరు సోదరులను అదుపులోకి తీసుకుని గంజాయి, డ్రగ్స్ వాడుతున్నారనే విషయంపై ప్రశ్నిస్తున్నారు.