రెండు వేల రూపాయల నోటును మార్కెట్ నుంచి ఉపసంహరించుకుంటూ రిజర్వ్ బ్యాంక్ ఆఫ్ ఇండియా తీసుకున్న నిర్ణయం సంచలనంగా మారింది. ఈ నిర్ణయంతో 2023, సెప్టెంబర్ 30వ తేదీ తర్వాత 2 వేల నోటు అనేది చిత్తు కాగితంగా మారనుంది. దీంతో సామాన్యుల నుంచి సెలబ్రిటీల వరకు అంతా రెండువేల నోటును చెల్లించుకునే ప్రయత్నం చేస్తున్నారు. అయితే ఈ క్రమంలో ఎవరి ఇంట్లో ఎన్ని రెండువేల నోట్లు బయటకు వస్తాయో అని అంతా ఎదురు చూస్తున్నారు. తాజాగా టాలీవుడ్‌కు చెందిన ప్రముఖ కమెడియన్ వెన్నెల కిశోర్.. ఇంట్లో రెండువేల నోట్ల కట్టలు గుట్టులుగా ఉన్న ఫోటో ఒకటి వైరల్ అవుతుంది.
ఒక ఫొటో కూడా లీక్ కావ‌డంతో అంద‌రు ఆశ్చ‌ర్యంలో మునిగిపోయారు. టాలీవుడ్ హీరో మంచు విష్ణు తన సోషల్ మీడియాలో ఓ ట్వీట్ చేస్తూ.. అందులో శ్రీ వెన్నెల కిషోర్ గారి ఇంటికి వెళ్లినప్పుడు ఈ కింది పోటో తీసుకొన్నాను అని అన్నారు. అయితే ఇప్పుడు నాకు ఆశ్చర్యం కలిగించే విషయం ఏమిటంటే.. వెన్నెల కిషోర్ ఈ నోట్లను ఏం చేస్తాడో అని నేను ఆలోచిస్తున్నాను అని కామెంట్ చేశాడు. మంచు విష్ణు చేసిన ఫోటోపై… నెటిజన్లు రకరకాలుగా స్పందిస్తున్నారు. నిజమేనా అన్నా అని కొందరు ప్రశ్నిస్తుంటే.. మరికొందరు.. మాకు ఓ నోట్ల కట్ట ఇవ్వు అన్నా.. ఉద్యోగం లేదు అంటున్నారు. మరికొందరు ఇన్ కం ట్యాక్స్ వాళ్లను పిలవాల్సిందే అంటున్నారు.
వెన్నెల కిషోర్, మంచు విష్ణు మంచి స్నేహితులని తెలిసిందే.వీళ్లిద్దరికి భలేగా టైమింగ్ కుదురుతూ ఉంటుంది. ‘దేనికైనా రెఢీ’ సహా కొన్ని చిత్రాల్లో వీరి కలయికలో కామెడీ బాగా పండింది. బయట కూడా ఒకరి మీద ఒకరు బాగా పంచులు వేసుకుంటూ ఉంటారు. కిషోర్‌ను సోషల్ మీడియాలో గిల్లుతూ ఉండటం విష్ణుకు అలవాటు. ఒక సినిమా వేడుకలో మాట్లాడుతూ.. కిషోర్‌కు బాగా పొగరని, తనను అదే పనిగా వెటకారాలు ఆడుతుంటాడని విష్ణు చెప్పడం.. దీనికి కిషోర్ సరదగా స్పందించడం గుర్తుండే ఉంటుంది. ఇప్పుడు కిషోర్‌ను మరోసారి సోషల్ మీడియా వేదికగా సరదాగా టార్గెట్ చేశాడు విష్ణు.