టాలీవుడ్‌లో మంచు ఫ్యామిలీ ఏం మాట్లాడినా అది చాలావరకు ఒక సెన్సేషన్ అవుతుంది. ముఖ్యంగా అందులోనూ మంచు విష్ణు ఏది మాట్లాడినా.. దానికి నానార్థాలు వెతికి తనను ట్రోల్ చేయాలని చూసేవారు చాలామంది ఉంటారు. ఇక చాలాకాలం తర్వాత తాజాగా ఒక ఇంటర్వ్యూలో పాల్గొన్న మంచు విష్ణు. తనకు సంబంధం లేని అనేక విషయాలపై తన అభిప్రాయాలను బయటపెట్టారు.
రాజకీయాల గురించి, పవన్ కళ్యాణ్ గురించి, ఏపీ పాలిటిక్స్ గురించి.. ఇలా చాలా అంశాల గురించి తాను ఏం అనుకుంటున్నాడో బయటపెట్టాడు విష్ణు. అంతే కాకుండా తన అప్‌కమింగ్ ప్రాజెక్ట్స్ గురించి కూడా అప్డేట్ ఇచ్చాడు. ఈ నేపథ్యంలో తనపై ట్రోలింగ్ చేస్తున్నది ‘స్నేక్’ బ్యాచ్ అంటూ డైరెక్ట్ కామెంట్స్ చేశారు మంచు విష్ణు. తాజాగా జాఫర్‌కి ఇచ్చిన ఇంటర్వ్యూలో మంచు విష్ణు ట్రోలింగ్ గురించి మాట్లాడుతూ.. ‘ట్రోలింగ్‌ని నేను పెద్దగా పట్టించుకోను. నన్నే కాదు నాలా చాలామందిని ట్రోల్ చేస్తుంటారు. అందరిపైనా దుర్భాషలు మాట్లాడుతూ ట్రోలింగ్‌కి పాల్పడుతున్నారు. కానీ కొన్నిసార్లు మితిమీరినప్పుడు మాత్రం సహించలేదు.
జన్యున్‌గా ఎవరైనా నాపై సెటైర్ వేస్తే ఎంజాయ్ చేస్తాను. కానీ కొన్ని పెయిడ్ బ్యాచ్‌లు ఉంటాయి.. పనికట్టుకుని డబ్బులిచ్చిమరీ ట్రోల్ చేయిస్తున్నారు. అయితే ట్రోలింగ్ అనేది ఎవరికి అవ్వడం లేదు.. ప్రభాస్‌కి అవ్వడం లేదా?? మహేష్ బాబుకి అవ్వడం లేదా? తారక్‌కి అవ్వడం లేదా? అందర్నీ ట్రోల్ చేస్తున్నారు. మా ఎలక్షన్స్ ముందు వరకూ నాపై ట్రోలింగ్ ఉండేది కాదు.. ఎలక్షన్ అప్పుడే నాపై ట్రోల్ చేశారు. అది ఎవరు చేయించారో అందరికీ తెలుసు. ఆ స్నేక్ బ్యాచ్ గురించి ఇప్పుడెందుకులే’ అని కవర్ చేసుకున్నారు మంచు విష్ణు.