ప్రపంచ వ్యాప్తంగా బిగ్గెస్ట్ రియాల్టీ షోగా నిలిచిన బిగ్ బాస్ తెలుగులో కూడా ఇప్పటికే ఆరు సీజన్లు పూర్తి చేసుకుని ఏడో సీజన్ కు సిద్ధమైంది. బుల్లితెరపై మరే షో కు దగ్గని టీఆర్పీతో ప్రేక్షకుల మన్ననలు అందుకుంది. బిగ్బాస్ సీజన్ 7 కోసం ప్రేక్షకులు ఆత్రుతగా ఎదురు చూస్తున్నారు. మరికొద్ది గంటల్లో ప్రారంభం బిగ్ బాస్ సీజన్ 7 ఆరంభం కాబోతుంది. నేటి(ఆదివారం) సాయంత్రం 7 గంటల నుంచి స్టార్ మా ఛానల్లో బిగ్ బాస్ సీజన్ 7 స్టార్ట్ కాబోతుంది. ఇప్పటికే బిగ్బాస్ ఇంట్లోకి అడుగుపెట్లే కంటెస్టెంట్ల జాబితాకు సంబంధించిన అనేక పేర్లు బయటకు వచ్చాయి. వారిలో హీరోహీరోయిన్స్ దగ్గర్నుంచి.. మోడల్స్, సీరియల్ నటీనటులు, యూట్యూబర్స్, సింగర్స్ ఇలా చాలా మంది పేర్లు వినిపించాయి. కానీ వారిలో బిగ్ బాస్ హౌస్ లోకి వెళ్లేది ఎవరనేది మరి కొన్ని గంటల్లో క్లారిటీ రానుంది.
బిగ్ బాస్ సీజన్ 6.. ప్లాప్ కావడంతో ఈసారి షోపై ప్రత్యేక దృష్టి పెట్టారు. అంతా ఉల్టా పల్టా అంటూ ప్రోమోలతోనే సీజన్ 7పై ఆసక్తిని కలిగించారు షో మేకర్స్. కుడిఎడమైతే పొరపాటు లేదోయ్.. ఓడిపోలేదోయ్ అంటూ ఈసారి షోలో చాలా మార్పులు చేసినట్లు తెలుస్తోంది. ఈసారి షోను పూర్తిగా మార్చి ప్రేక్షకులకు కొత్తదనం చూపించబోతున్నారని సమాచారం. ఇప్పటికే హౌసులో బిగ్ బాస్ కంటెస్టెంట్స్ ఆట మొదలుపెట్టారు. బిగ్ బాస్ హౌస్‌లోకి కూడా వెళ్లిపోయారు. ఇదంతా ఈ రోజు సాయంత్రం బుల్లి తెరపై ప్రసారం అవుతుంది. అయితే బిగ్ బాస్ సీజన్ 7కు ముఖ్య అతిథులుగా టాలీవుడ్ కి చెందిన ఇద్దరు క్రేజీ హీరోలు వచ్చారట. ఇంత‌కీ వారెవ‌రో కాదు టాలీవుడ్ రౌడీ బాయ్ విజయ్ దేవరకొండ, ఎనర్జిటిక్ హీరో నవీన్ పొలిశెట్టి. ఈ ఇద్దరు హీరోలు తమ సినిమాలను ప్రమోట్ చేసుకునేందుకు బిగ్ బాస్ షోకు వస్తున్నట్లు తెలుస్తోంది. విజయ్ దేవరకొండ ఖుషి సినిమాతో సెప్టెంబర్ 1న ప్రేక్షకుల ముందుకు వచ్చాడు. ఈ బిగ్ బాస్ షో ద్వారా ఖుషి సినిమాకు మరింత ప్రమోషన్ చేసేందుకు విజయ్ ప్రయత్నిస్తున్నారు. మ‌రోవైపు నవీన్ పొలిశెట్టి, అనుష్క శెట్టి జంట‌గా న‌టించిన మిస్ శెట్టి.. మిస్టర్ పోలిశెట్టి ఈ నెల 7న థియేట్లర్లో సందడి చేయనుంది. ఈ నేపథ్యంలో నవీన్ బిగ్ బాస్ వేదికగా తన సినిమాను ప్రమోట్ చేసుకోనున్నారు.