Thalaivar170 : ఇద్దరు దిగ్గజ నటులను ఒకే స్క్రీన్ మీద చూడటం అంటే సినీ ప్రేక్షకులకు పండుగే. ఇద్దరు ‘సూపర్ స్టార్స్’ను ఒకే ఫ్రేమ్ లో చూస్తుంటే వచ్చే ఆ కిక్కే వేరప్ప. అలా చూసే అవకాశం భారతీయ ప్రేక్షకులకు దక్కుతోంది. బాలీవుడ్ సూపర్ స్టార్ అమితాబ్ బచ్చన్, కోలీవుడ్ సూపర్ స్టార్ రజనీకాంత్ కలిసి వెండితెర మీద సందడి చేసేందుకు సిద్ధం అవుతున్నారు. దాదాపు 30ఏళ్ల తర్వాత ఈ అరుదైన కలయికకు ‘తలైవర్ 170’ చిత్రం తీసుకురాబోతుంది.
వరుస ఫ్లాపుల తర్వాత ‘జైలర్’ సినిమాతో రజినీకాంత్ స్ట్రాంగ్ కంబ్యాక్ ఇచ్చారు. ఈ సినిమా ఇచ్చిన ఉత్సామంతో బ్యాక్ టూ బ్యాక్ చిత్రాలకు ఓకే చెబుతున్నారు. ఇందులో భాగంగా తలైవార్170 సినిమాకు సంబంధించిన అఫీషియల్ అనౌన్స్ మెంట్ వచ్చేసింది. ‘జై భీమ్’ ఫేమ్ టీజే జ్ఞానవేల్ దర్శకత్వంలో రజనీకాంత్ తన తదుపరి సినిమా చేయబోతున్నారు. ఈ సినిమాలో రజనీతో నటించనున్న నటీనటుల జాబితాను చిత్ర బృందం తాజాగా వెల్లడించింది. ఈ క్రేజీ ప్రాజెక్ట్ లో అమితాబ్ నటిస్తున్నట్లు ప్రకటించారు.
ది షాహెన్‌షా ఆఫ్ ఇండియన్ సినిమాకి స్వాగతం అంటూ ఆయనకు సంబంధించిన ఓ పోస్టర్ ను సోషల్ మీడియాలో షేర్ చేశారు. దీన్ని బట్టి ఇందులో బిగ్ బీ కీలకపాత్ర పోషిస్తున్నట్లు తెలుస్తోంది. నిజానికి వీరిద్దరూ కలిసి నటించడం ఇదే మొదటి సారి కాదు. 1991లో ‘హమ్’ అనే హిందీ సినిమాలో కలిసి చేశారు. 32 ఏళ్ల తర్వాత మళ్ళీ జత కట్టబోతున్నారు.
మరి ఈ సినిమా బాక్సాఫీస్ వద్ద ఎలాంటి సంచలనాలు సృష్టిస్తుందో చూడాలి. ఈ చిత్రంలో రజనీ, అమితాబ్ లతో పాటు రానా దగ్గుబాటి కూడా కీలక పాత్ర పోషిస్తు్న్నారు. వారే కాకుండా ఫహద్ ఫాసిల్, మంజు వారియర్, రితికా సింగ్, దుషారా విజయన్ తదితరులు నటిస్తున్నారు. లైకా ప్రొడక్షన్స్ బ్యానర్ పై సుభాస్కరన్ అత్యంత భారీ బడ్జెట్ తో ఈ సినిమాని నిర్మించనున్నారు. జైలర్ సినిమాకు సంగీతం అందించిన అనిరుధ్ రవిచందర్ సంగీతం సమకూర్చనున్నారు.