Pavitra : ఇండస్ట్రీలో తీవ్ర విషాదం నెలకొంది. బుల్లితెర నటి పవిత్ర జయరామ్ కారు ప్రమాదంలో మరణించారు. మహబూబ్ నగర్ జిల్లా భూత్పూర్ మున్సిపాలిటీ పరిధిలోని శేరిపల్లి (బి) గ్రామం వద్ద నేషనల్ హైవేపై ఆదివారం తెల్లవారుజామున జరిగిన రోడ్డు ప్రమాదంలో పవిత్ర జయరామ్ మృతి చెందినట్లు తెలుస్తోంది. కర్ణాటకలోని తన సొంత గ్రామికి వెళ్లి తిరిగి హైదరాబాద్ వస్తుండగా ప్రమాదం చోటు చేసుకుంది. ఈరోజు తెల్లవారుజామున కారు అదుపుతప్పి డివైడర్ను ఢీకొట్టి.. కుడివైపున హైదరాబాద్ నుంచి వనపర్తి వస్తున్న ఆర్టీసీ బస్సును ఢీకొట్టింది. ఘటనలో పవిత్ర జయరామ్ అక్కడిక్కడే మరణించింది. ఆమెతోపాటు కారులో తన తోటి నటులు, కుటుంబసభ్యులు కూడా ఉన్నారని సమాచారం.
కర్ణాటకకు చెందిన నటి పవిత్ర జయరామ్ ‘రోబో ఫ్యామిలీ’ అనే కన్నడ కామెడీ సీరియల్ ద్వారా నటిగా ఇండస్ట్రీకి ఎంట్రీ ఇచ్చారు. ఆ తర్వాత పలు సీరియల్స్‌లో నటించారు. పవిత్ర తెలుగులో త్రినయని అనే ఒక పాపులర్ సీరియల్‌లో కూడా నటిస్తోంది. పవిత్ర జయరామ్ కన్నడ ప్రేక్షకులకే కాదు తెలుగు ప్రేక్షకులకు కూడా బాగా దగ్గరైంది. దీనికి సంబంధించిన మరింత సమాచారం ఇంకా బయటకు రావాల్సి ఉంది.
కన్నడిగులకు చెందిన పవిత్ర, త్రినయని అనే తెలుగు సీరియల్ ద్వారా తెలుగు రాష్ట్రాల్లో బాగా పాపులర్ అయింది. కన్నడ ‘రోబో ఫ్యామిలీ’ ద్వారా బుల్లితెరపై అడుగుపెట్టిన పవిత్ర, మాండ్య తాలూకాలోని హనకెరె స్వస్థలం. పవిత్ర ‘రోబో ఫ్యామిలీ’, ‘జోకలి’, ‘నీలి’, ‘రాధారమన్’ వంటి కొన్ని సీరియల్స్‌లో నటించి పాపులర్ అయ్యింది. ఇప్పుడు పాపులర్ తెలుగు సీరియల్ త్రినయనిలో నటిస్తున్నారు. ఈ సంఘటనలో వారి బంధువు ఆపేక్ష, డ్రైవర్ శ్రీకాంత్, ఆమె తోటి నటుడు చంద్రకాంత్ (చందు) కు తీవ్ర గాయాలయ్యాయి. సమాచారం అందుకున్న వెంటనే భూత్పూర్ పోలీసులు సంఘటన స్థలానికి చేరుకున్నారు. గాయపడ్డ వారిని జిల్లా ఆస్పత్రికి తరలించారు. ఈ మేరకు పోలీసులు కేసు దర్యాప్తు చేస్తున్నారు.