Ramayan : మన ఇతిహాసాలు ‘రామాయణం’, ‘మహా భారతం’ ఆధారంగా ఇప్పటికే ఎన్నో సినిమాలు తెరకెక్కి ప్రేక్షకులను అలరించిన సంగతి తెలిసిందే. అయినా వాటి ఆధారంగా కొత్త కొత్త సినిమాలు, సిరీస్ లు వస్తూనే ఉన్నాయి. ఇక ఇప్పుడు కొత్త టెక్నాలజీల వినియోగంతో నితీష్ తివారి సరికొత్త ‘రామాయణం’ రూపొందిస్తున్నారు. దీనికి సంబంధించిన షూటింగ్ కూడా మొదలైంది. ఇందుకోసం భారీ సెట్లు వేశారు. ఈ సినిమాలో నటించే నటీ నటుల గురించి రకరకాల వార్తలు వస్తున్నాయి.
రామ్ పాత్రలో రణబీర్ కపూర్ ని చూడాలని అభిమానులు ఎదురు చూస్తున్నారు. తాజాగా ఈ సినిమా షూటింగ్ నుంచి ఈ ఫోటోలు లీక్ అయ్యాయి. సెట్ నుండి లీకైన ఫోటోలు సోషల్ మీడియాలో వైరల్ కావడంతో సినిమాపై అభిమానుల్లో ఉత్కంఠ పెరిగింది. రామాయణం షూటింగ్ కోసం ముంబైలో భారీ సెట్‌ను వేశారు. ఈ సెట్ నుండి సాయి పల్లవి సీత పాత్రలో, రణబీర్ రామ్ పాత్రలో కనిపించిన ఫోటోలు లీక్ అయ్యాయి. రామాయణం సెట్స్ నుండి లీక్ అయిన చిత్రాలలో రణబీర్ రామ్‌గా కనిపిస్తాడు. ఆయన మెరూన్, ఊదా రంగు దుస్తులను ధరించాడు. మెడలో బంగారు హారం, కంకణం ధరించి ఉన్నాడు. సాయి పల్లవి కూడా సీత దుస్తుల్లో చాలా అందంగా ఉంది. సాయిపల్లవి ముఖంలో సింప్లిసిటీ కనిపిస్తుంది. తొలి చిత్రాలను చూస్తుంటే ఈ షెడ్యూల్ రామ్-సీత పెళ్లి తర్వాత అని తెలుస్తోంది. ఇద్దరూ రాజు, రాణిలా కనిపిస్తున్నారు.
ఇప్పటికే వచ్చిన టీవీ, సినిమాల రామాయణంలో, రాముడు, సీత కుంకుమ రంగు దుస్తులలో కనిపిస్తారు. కానీ నితీష్ తివారీ మాత్రం తన రామాయణానికి వేరే రంగును ఇచ్చేందుకు ప్రయత్నించాడు. సింప్లిసిటీని మెయింటైన్ చేయడంతో పాటు నటీనటులకు సింపుల్ లుక్ కూడా ఇచ్చారు. ఇటీవల, కైకేయిగా లారా దత్తా, మంథరగా షీబా చద్దా కొన్ని చిత్రాలు కూడా సెట్స్ నుండి లీక్ అయ్యాయి. ముంబయిలో వేసిన భారీ సెట్‌లో రాముడి జననం, గురుకులం, రాముడు-సీత వివాహం వంటి కొన్ని ముఖ్యమైన సన్నివేశాలను చిత్రీకరించారు. రావణుడు, హనుమంతుడు పాత్రలను పోషిస్తున్న యష్, సన్నీ డియోల్ జూలై నుండి తమ పార్ట్‌ల షూటింగ్‌ను ప్రారంభించనున్నారు. రామాయణం తదుపరి షెడ్యూల్ లండన్‌లో చిత్రీకరించబడనున్నట్లు సమాచారం.
View this post on Instagram