Rana Daggubati : ఆంధ్ర ప్రదేశ్ లో సార్వత్రిక ఎన్నికల పర్వం మొదలైంది. రాజకీయ పార్టీలు ఎవరి వ్యూహాలతో వాళ్ళు ముందుకు దూసుకుపోతున్నారు. కొన్ని రాజకీయ పార్టీలు అయితే అధినేతల మీద ప్రత్యేకంగా సినిమాలు చేయించుకున్నారు. ఉదాహరణకి ఆంధ్ర సీఎం జగన్ మోహన్ రెడ్డి జీవిత చరిత్ర ఆధారంగా ‘యాత్ర 2 ‘ అనే చిత్రం తెరకెక్కింది. ఈ సినిమా మరో నాలుగు రోజుల్లో ప్రేక్షకుల ముందుకు రాబోతుంది. ఈ సినిమాకి సంబంధించిన థియేట్రికల్ ట్రైలర్ ని ఈరోజు విడుదల చెయ్యగా దానికి ఆడియన్స్ నుండి మంచి రెస్పాన్స్ వచ్చింది.
అయితే త్వరలోనే పవన్ కళ్యాణ్ బయోపిక్ కూడా తెరకెక్కబోతుంది అని ఇండస్ట్రీ వర్గాల్లో లేటెస్ట్ గా వినిపిస్తున్న వార్త. కేవలం ఆయన రాజకీయ ప్రస్థానం మీద ఒక సినిమా తియ్యబోతున్నారట. ఈ సినిమాలో దగ్గుపాటి రానా హీరోగా నటించనున్నాడు. యాత్ర, యాత్ర 2 లాగా నేరుగా ఆయా రాజకీయ నాయకుల పాత్రలను ప్రస్తావించకుండా, కేవలం జనసేన సిద్ధాంతాలు ప్రతిభింబించేలా ఈ సినిమా ఉంటుందట.
గతం లో దగ్గుపాటి రానా హీరో గా ‘లీడర్’ అనే సినిమా వచ్చింది. ఇది ఆయన మొదటి సినిమా. తొలి సినిమాతోనే సూపర్ హిట్ ని అందుకున్న రానా, నటుడిగా కూడా మంచి పేరుని ఈ సినిమా ద్వారా దక్కించుకున్నాడు. ఈ సినిమాకి సీక్వెల్ గానే ఈ చిత్రం రాబోతుంది. శేఖర్ కమ్ముల ఈ సినిమాకి దర్సకత్వం వహించే ఛాన్స్ ఉందని అంటున్నారు. ఈ సినిమాలోని ప్రతీ సన్నివేశం చూస్తున్నప్పుడు మనకి పవన్ కళ్యాణ్ గుర్తుకు వస్తాడట.
ఆ రేంజ్ లో స్క్రిప్ట్ ని సిద్ధం చేసినట్టు సమాచారం. ప్రస్తుతం శేఖర్ కమ్ముల ధనుష్ – నాగార్జున తో కలిసి ఒక సినిమా చేస్తున్నాడు. ఈ చిత్రం పూర్తి అయిన వెంటనే ఈ ప్రాజెక్ట్ సెట్స్ మీదకు వెళ్లే అవకాశం ఉందని అంటున్నారు. మరి ఇందులో ఎంత మాత్రం నిజం ఉందో అతి త్వరలోనే తెలియనుంది.
