Bigg Boss Amardeep : గత సీజన్ బిగ్ బాస్ హౌస్ లో మాస్క్ లేకుండా ఆడిన ఏకైక కంటెస్టెంట్ గా అమర్ దీప్ కి మంచి పేరు ప్రఖ్యాతలు వచ్చింది. బిగ్ బాస్ హౌస్ లోకి అడుగుపెట్టకముందు నుండే అమర్ దీప్ కి మంచి ఫ్యాన్ ఫాలోయింగ్ ఉంది. కానీ హౌస్ లోకి వచ్చిన తర్వాత అసలు అమర్ దీప్ అంటే ఏమిటో అందరికీ అర్థం అయ్యింది.
గత సీజన్ అంత పెద్ద బ్లాక్ బస్టర్ అవ్వడానికి ప్రధాన కారణాలలో ఒకటి అమర్ దీప్ అని చెప్పడం లో ఎలాంటి సందేహం లేదు. హౌస్ నుండి బయటకి వచ్చిన తర్వాత అమర్ దీప్ కి మంచి అవకాశాలు వస్తాయని అనుకున్నారు ఆయన అభిమానులు. ఎందుకంటే అమర్ దీప్ లో ఉన్నటువంటి ఎంటర్టైన్మెంట్ యాంగిల్ అలాంటిది. అద్భుతమైన కామెడీ టైమింగ్ తో పాటుగా, బీభత్సమైన డ్యాన్స్ టాలెంట్ అమర్ డీప్ సొంతం.
బిగ్ బాస్ గ్రాండ్ ఫినాలే సమయం లో తన అభిమాన హీరో మాస్ మహారాజ రవితేజ చిత్రం లో నటించే అవకాశం ని కొట్టేసిన అమర్ దీప్, ఇప్పుడు అతి త్వరలోనే ఆయన హీరో గా ఒక సినిమా చెయ్యబోతున్నాడు. ఈ చిత్రం లో హీరోయిన్ గా ప్రముఖ నటి సురేఖ వాణి కూతురు సుప్రీతా నాయుడు నటించబోతుంది. M3 మీడియా బ్యానర్ లో మహేంద్ర నాధ్ ఈ సినిమాని నిర్మించబోతున్నాడు.
ఈ చిత్రం లో సీనియర్ హీరో వినోద్ కుమార్ తో పాటుగా, రాజా రవీంద్ర వంటి సీనియర్ నటులు నటించబోతున్నారు. ఈ చిత్రానికి సంబంధించిన పూజా కార్యక్రమాలు నేడు హైదరాబాద్ లో గ్రాండ్ గా జరిగింది. గతం లో కూడా అమర్ దీప్ ‘అభిలాష’, ‘ ఐరావతం’ వంటి చిత్రాలలో హీరో గా నటించాడు కానీ, అవి కమర్షియల్ గా సక్సెస్ కాలేకపోయింది. ఇప్పుడు బిగ్ బాస్ తర్వాత చేస్తున్న ఈ సినిమాతో అయినా ఆయన సక్సెస్ కొట్టి ఇండస్ట్రీ లో హీరోగా నిలదొక్కుకుంటాడో లేదో చూడాలి.