Unstoppable 2 with NBK .. నందమూరి బాలకృష్ణకు సినిమాలతో ఎంత పాపులారిటీ వచ్చిందో.. అంతకుమించిన పాపులారిటీ ఈ షోతో వచ్చింది. ఆహా ఓటీటీ వేదికగా స్ట్రీమింగ్ అవుతున్న ఈ కార్యక్రమానికి తెలుగు రాష్ట్రాల నుంచి లక్షల్లో అభిమానులున్నారు. కేవలం బాలయ్య అభిమానులే కాదు.. అందరు హీరోల అభిమానులు ఈ షోపై ఇష్టం పెంచుకున్నారు.
అన్స్టాపబుల్ షోతో ఆహా రేంజ్ ఒక్కసారిగా పెరిగిపోయింది. ఈ ఓటీటీలో వస్తున్న సినిమాలు, వెబ్ సిరీస్లు, ప్రోగ్రామ్స్ అన్ని ఒకెత్తైతే అన్స్టాపబుల్ షో మరో ఎత్తు. ఇప్పటికే సీజన్-1 పూర్తి చేసుకున్న ఈ కార్యక్రమానికి.. హోస్ట్ బాలయ్యకు వస్తున్న రెస్పాన్స్ చూసి ఆహా టీమ్ రెండో సీజన్ ప్లాన్ చేసింది. ఇక రెండో సీజన్ గెస్టుల లిస్టు చూసి ఫ్యాన్స్ నేలమీద నిలబడలేకపోతున్నారు.
నారా చంద్రబాబు నాయుడితో సెకండ్ సీజన్ గ్రాండ్గా స్టార్ట్ చేశారు. ఆ తర్వాత కిరణ్ కుమార్ రెడ్డి, సీనియర్ హీరోయిన్ రాధిక, జయప్రద వంటి వాళ్లు ఈషోకు గెస్టులుగా వచ్చారు. వాళ్లే కాకుండా యంగ్ హీరోలు సిద్ధు, విశ్వక్ సేన్, అడివి శేష్, శర్వానంద్లు కూడా ఈ షోలో పాల్గొన్నారు. అప్పటికే వస్తున్న గెస్టులతో ఫ్యాన్స్ ఉబ్బితబ్బిబైపోతున్న తరుణంలో.. ఆహా తెలుగు ప్రేక్షకులకు భారీ సర్ప్రైజ్ ఇచ్చింది.
పాన్ ఇండియా స్టార్.. ప్రభాస్తో ఓ ఎపిసోడ్ ప్రకటించింది. ఇక ఈ ఎపిసోడ్కు సంబంధించి గ్లింప్స్ నుంచి, ప్రోమో.. పూర్తి ఎపిసోడ్ వచ్చే వరకు ఫ్యాన్స్ హంగామా మామూలుగా లేదు. ఇక ప్రభాస్ ఫ్యాన్స్ ఉత్సాహం చూసి ఆహా టీమ్ ఈ ఎపిసోడ్స్ను రెండు భాగాలుగా షూట్ చేసింది. ఫస్ట్ భాగం రిలీజ్ చేసిన క్షణాల్లోనే ఫ్యాన్స్ ఉత్సాహంతో ఏకంగా ఆహా సర్వర్ డ్యామేజ్ అయింది. ఇక ఈ షోలో ప్రభాస్తో బాలయ్య చేసిన హంగామా అంతా ఇంతా కాదు.
ఎలాగైనా ప్రభాస్ చేత తన మనసులో ఉన్న అమ్మాయి గురించి చెప్పించాలని తాపత్రయంతో ప్రభాస్ను ఇరకాటంలో పడేసేందుకు ప్రయత్నించాడు. ఈ ఎపిసోడ్లో ప్రభాస్తో పాటు తన క్లోజ్ఫ్రెండ్ గోపీచంద్ కూడా పాల్గొన్నాడు. ఈ ఇద్దరు కలిసి బాలయ్యను ఓ పట్టుపట్టారు. బాలయ్య కూడా ఈ ఇద్దరితో బానే ఆడుకున్నాడు. ఈ ఎపిసోడ్ ఇప్పటికీ ట్రెండింగ్లో ఉంది.
ఇక ప్రభాస్ షోకు వస్తున్నాడని తెలియగానే పవర్ స్టార్ పవన్ కల్యాణ్ ఫ్యాన్స్ లొల్లి షురూ చేశారు. తమ అభిమాన హీరోను షోకు తీసుకురావాలని ఆహాపై ఓ యుద్ధమే చేశారు. ఎట్టకేలకు ఫ్యాన్స్ డిమాండ్ మేరకు ఆహా తలొగ్గక తప్పలేదు. వెంటనే అన్స్టాపబుల్కు పవన్ కల్యాణ్ వస్తున్నాడంటూ ఓ పోస్టు పెట్టింది. ఇక అప్పటి నుంచి ఎప్పుడెప్పుడు పవర్ స్టార్ ఎపిసోడ్ ఉంటుందా అని ఫ్యాన్స్ తెగ ఉత్సాహంగా చూస్తున్నారు.
ఎప్పుడెప్పుడా అని ఎదురుచూస్తున్న పవర్స్టార్ పవన్ కల్యాణ్ అన్స్టాపబుల్ ఎపిసోడ్ గురించి ఓ లేటెస్ట్ అప్డేట్ రిలీజ్ చేసింది ఆహా టీమ్. ఎన్బీకే అన్స్టాపబుల్ సీజన్ 2 ఎపిసోడ్కి సంబంధించిన ఆ గ్లింప్స్ను విడుదల చేశారు. ‘నేను నీ కొలతలు తీసుకుంటా’ అంటూ బాలయ్య అనగానే.. పవణ్ కల్యాణ్ పగలబడి నవ్వారు. గ్లింప్స్ రిలీజయ్యేకంటే ముందు నుంచే సంబరాలు చేసుకున్నారు ఫ్యాన్స్. ట్విట్టర్లో హ్యాష్ట్యాగులతో ట్రెండింగ్ సైతం చేశారు. గ్లింప్స్లో పవన్ అవుట్ఫిట్ కేక అని నెటిజన్లు కామెంట్ చేస్తున్నారు. మరోవైపు ఎపిసోడ్లో ఎటువంటి ప్రశ్నలు ఉండనున్నాయో అని ఆసక్తి కనబరుస్తున్నారు.